Төгсөгчдийн холбооны ажил үйлс

ХААИС – ийн цахилгаан хангамжийн инженер бэлтгэдэг Цахилгаан хангамж, электроникийн тэнхим 2006 – 2022 оны хооронд 1000 инженер техникийн боловсон хүчин бэлтгэн гаргасан байна. 2018 онд “ХААИС – ийг цахилгаан хангамжийн инженер мэргэжлээр төгсөгчдийн холбоо” – г үүсгэн байгуулсан юм. Тус холбоо нь инженерүүдийн мэргэжлийн ур чадвар, хөдөлмөр эрхлэлтийг дэмжих сургалт, семинар зохион байгуулах, мэргэжлийн үйлчилгээ үзүүлэх зэрэг олон талт ажлыг эрхлэн явуулдаг юм. 

Төгсөгчдийн дурсамж 

Пүрэвдоржийн БАЯРЖАРГАЛ

     Төгссөн сургууль: 

• 2003 онд ГАА-ийн Ерөнхий боловсролын 3 дугаар сургууль;
• 2007 онд ХААИС-ийг Цахилгаан хангамжийн инженерээр төгссөн.

  Ажилласан байдал:

• 2007-2008 онд ГАА-ийн ЭХНҮ-т шугам засварын монтёр
• 2008-2009 онд ГАА-ийн ЭХНҮ-т ДЦС-ын удирдах хуваарилах байгууламжийн цахилгаанчин
• 2009-2010 онд “АУЭХС” ТӨХК-д Реле хамгаалалт автоматикийн инженер
• 2010-2020 онд “АУЭХС” ТӨХК-д Тоолуур хэмжүүрийн инженер 
• 2021 оноос өнөөдрийг хүртэл “АУЭХС” ТӨХК-д Борлуулалт үйлчилгээний хэлтсийн даргаар тус тус ажиллаж байна.

Шагнал, урамшил: 

• 2008 онд ЭХНҮ-ийн ажил мэргэжлийн аварга
• 2012 онд  “АУЭХС” ТӨХК-ийн борлуулалтын шилдэг ажилтан
• 2014 онд Эрчим хүчний яамны жуух бичиг
• 2015 онд Хөдөлмөрийн яамны жуух бичиг
• 2016 онд Эрчим хүчний тэргүүний ажилтан
• 2018 онд “АУЭХС” ТӨХК-ийн шилдэг инженер
• 2018 онд Аймгийн онцлох залуу
• 2019 онд Аймгийн тэргүүний залуу инженер алтан медаль 
• 2019 онд Стандартчилал хэмжилзүйн газрын жуух бичиг

Миний бахархал

         Миний бие 2003 онд ХААИС – ийн Инженерийн сургуульд Цахилгааны инженерийн ангид элсэн орж 9 дүгээр сарын 01-нд хөдөөний бор охин аавдаа хөтлүүлэн ирж хорь гаран хөвгүүдтэй, гуравхан охинтой ангид ороод эхлээд ч айх гайхах зэрэгцэн ямар ч сургуульд орчихвоо гээд эргэлзэж байлаа. Гэвч цаг хугацаа харвасан сум шиг өнгөрч нэг л мэдэхэд ангийнхандаа сургуульдаа дасаж энэ бодол минь алга болсон юм.

         Суралцах хугацаандаа аав ээжийнхээ итгэлийг алдахгүйн тулд их л идэвхтэй хичээлээ сайн хийдэг онц сурдаг оюутан байлаа. Энэ нь ангийн багш Г. Батбаяр удирдан чиглүүлж доктор, профессор Ш.Цэвэгсүрэн, Р.Бүүвэйбаатар, Д.Гантулга, Х.Рахмет, Д.Даваасүрэн, Р.Байгалмаа  багш нараараа мэргэжлийн хичээлүүдээ заалгаж, тусалж дэмжиж байсныг эргэн дурсахад сайхан байна.

         Цахилгааны инженер гэсэн гэгээлэг мэргэжил эзэмшин эрчмийнхэн гэсэн энерги сайтай хамт олонтой нэгэн зорилгын төлөө хамтран ажиллаж байгаадаа мөнхөд би бахархана.

         Эрчим хүчнийхэн гэж нэрлэгддэг энэ том айлд нэгэн эд эс нь болж ард иргэдээ илч гэрлээр тасралтгүй найдвартай хангах их үйлсэд оюун ухаан, хүч хөдөлмөр, авъяас билгээ зориулж их түүхийг бүтээлцэж байгаа сургуулийнхаа нийт инженерүүд болон эрдэмтэн багш, ажилчид нартаа ойн баярын мэндийг хүргэж эрүүл энх аз жаргал сайн сайхан бүхнийг хүсье. 

Бусад төгсөгчдийн нэрс болон дурсамжийг ЭНД дарж үзнэ үү

Төгсөгчдийн грүүп https://www.facebook.com/groups/289099061596809